Kandidati i Partisë Demokratike të Kosovës për Fushë Kosovë, Rrahim Tërnava, ka reaguar pas raportimeve në media për mundësi marrëveshjesh apo koalicionesh për balotazhin e 9 nëntorit.

Në një postim, Tërnava ka sqaruar se takimet me përfaqësuesit e LDK-së dhe të Lëvizjes Vetëvendosje janë zhvilluar me iniciativën e tyre dhe kanë qenë vetëm takime konsultative.

“Jemi në demokraci, prandaj takimet janë pjesë e kulturës politike, nuk janë as blasfemi e as herezi. Në këto takime nuk është vendosur për asgjë konkrete – dmth nuk bëhet fjalë për marrëveshje e as koalicione, por për konsultime të zakonshme,” – ka theksuar Tërnava.

Ai shtoi se çdo vendim eventual për koalicione apo marrëveshje do të merret në degën e PDK-së, në konsultim të plotë me qendrën e partisë.

Tërnava gjithashtu ka akuzuar disa media për publikimin e “lajmeve tendencioze dhe me konotacion politik”, duke i cilësuar ato si “spekulime për qëllime folklorike dhe komerciale”.